கடைசி பதிவு

அனைவருக்கும் தீபத்திருநாள் வாழ்த்துக்கள்

இத்துடன் அகரவலை தன் பயணத்தை முடித்துக்கொள்கிறது.

2004 செப்டம்பர் 24 அன்று முதல் பதிவை துவக்கிய அகரவலையின் பயணம் இன்று நிறைவு பெறுகிறது.

இதுவரை வாசித்த விமர்சித்த அனைவருக்கும் நன்றி.

தமிழ்ப்பதிவுகள்

அபூர்வ ராகங்கள்

அதிசய ராகமாக தமிழ்த் திரையுலகில் பூத்த ஸ்ரீவித்யா என்ற தாரகை நேற்று உதிர்ந்தது. பாலசந்தரின் இயக்கத்தில் ஸ்ரீவித்யாவின் அபூர்வமான நடிப்பில் கமல் நாயகனாக நடித்த புகழ்பெற்ற படத்தில் தான் ரஜனிகாந்த் அறிமுகமானார். குணச்சித்திர தாரகையாக வலம் வந்த ஸ்ரீவித்யா புகழ்பெற்ற கர்நாடக சங்கீதப்பாடகி எம்.எல்.வசந்தகுமாரியின் புதல்வி.

சமீபகாலமாக திருவனந்தபுரத்தில் தங்கியிருந்த ஸ்ரீவித்யா மலையாள தொலைக்காட்சித் தொடர்களிலும் நடித்து வந்தார். புற் றுநோய் தாக்கி மருத்துவமனையில் சிகிட்சை பெற்று வந்த அவர் நேற்றிரவு காலமானார். இன்று காலை பொதுமக்கள் மற்றும் திரையுலகினரின் அஞ்சலிக்காக அவரது வீட்டிலும் பின்னர் பொது அரங்கு ஒன்றிலும் வைக்கப் பட்டபின் அரசு மரியாதையுடன் அவரது உடல் தகனம் செய்யப்பட்டது.

தமிழில் சிவாஜி கணேசன் நடித்த திருவருட்செல்வர் திரைப்படத்திலும் மலையாளத்தில் நடிகர் சத்யன் நடித்த சட்டம்பிக்கவல என்ற படத்திலும் தன் திரையுலக வாழ்வை ஆரம்பித்த போது ஸ்ரீவித்யாவுக்கு 13 வயது.

அபூர்வராகங்களின் போது கமலஹாசனால் காதலிக்கப்பட்ட அவர், குடும்பத்தினரின் சம்மதம் கிடைக்காததால் திருமணம் தாமதமான நிலையில் கமல் வாணியைத் திருமணம் செய்து கொண்டதால் இவரும் தனக்கு அச்சூழலில் ஆறுதலாக இருந்த ஜார்ஜ் தாமஸ் என்ற தயாரிப்பாளரை திருமணம் செய்து கொண்டார்.

நோய் கடுமையாகி மருத்துவமனையில் இருந்த போது கடைசி தினங்களில் தன்னைக்காண திரையுலக நண்பர்களை அனுமதிக்க மறுத்துவிட்டார். ஆயினும் அந்நிலையிலும் தன்னைக் காண வந்த கமலஹாசனை மட்டும் சந்தித்தார் என்பது குறிப்பிடத்தக்கது.

நடிகையாக மட்டுமல்லாமல் நர்த்தகியாகவும் புகழ் பெற்றிருந்த ஸ்ரீவித்யா தன் இறுதிக்காலத்தில் ஒரு நடனப்பள்ளி நடத்த விரும்பியிருந்தாராம். அது நிறைவேறாத ஆசையாகவே போய்விட்டது.

உலகப்புகழ் சங்கீதப் பாடகியின் மகளான ஸ்ரீவித்யாவும் நல்ல பாடகி. சில திரைப்படங்களிலும் பாடியுள்ள அவர் நான்கு வருடங்களுக்கு முன் நண்பர்களின் வற்புறுத்தலால் கேரளாவில் தானே இயற்றிய கீர்த்தனங்களுடன் சங்கீதக்கச்சேரி நிகழ்த்தினார். அதற்குக்கிடைத்த பாராட்டுக்களால் தொடர்ந்து பல கச்சேரிகள் பாடினார்.

கேரள மாநில அரசின் சிறந்த நடிகைக்கான விருதை இவர் இருமுறை பெற்றுள்ளார். மாநில அரசு மரியாதையோடு நடைபெற்ற இவரது இறுதிச்சடங்கை மூன்று மலையாள தொலைக்காட்சி சேனல்கள் இன்று காலை முதலே நேரடி ஒளிபரப்புச் செய்தன.

கணவனைப் பிரிந்து தனியாகவே வாழ்ந்து வந்த ஸ்ரீவித்யாவுக்கு குழந்தைகள் இல்லை என்பதே மிகப்பெரிய சோகமாக இருந்திருக்கிறது.

தமிழ்ப்பதிவுகள்

பாட்டுக் கேட்க!

இதில் உள்ள பாடல் classmates என்ற புதிய திரைப்படப்பாடல். உள்ளூர் கேபிள்களில் ஒரு நாளைக்கு 50 முறையாவது ஒளிபரப்பாகி வருகிறது. பாடலின் இனிமையோடு காட்சியில் நகைச்சுவையும் மிகுந்த ரசனைக்குரியவை. கேட்கக்கேட்க பார்க்கப்பார்க்க இனிமை.

இந்தப்படத்தில் நான்கு நாயகர்கள். பாக்கியராஜ் மகளுடன் டூயட் பாடிய பிரித்விராஜ், பிரித்வியின் அண்ணன் இந்திரஜித் (இவர்கள் மறைந்த மலையாள நடிகர் சுகுமாரனின் புதல்வர்கள்), என்மனவானில் ஊமைப்பையன் ஜெயசூர்யா, சித்திரம்பேசுதடி நரேன்.

நாயகி எனமனவானில் ஊமைப்பெண் காவ்யா. கேரள பாக்கியராஜ் பாலச்சந்திரமேனன், கேரளாவின் வடிவேலு (கவுண்டமணி?) ஜகதி மற்றும் நட்சத்திர பட்டாளமே நடித்திருக்கும் இந்தப்படம் சமீபத்தில் வெளியாகி சக்கைப்போடு போடுகிறது. பாடல்கள் அனைத்தும் பயங்கர ஹிட்.

தமிழ்ப்பதிவுகள்

யாருக்கு முதலிடம்?

இது தேர்தல் நேரம். உள்ளாட்சித் தேர்தல்கள் முடிந்து விட்டன. தேர்தல் எண்ணிக்கை முடிந்து முடிவுகள் வெளியாகும் நாளை எதிர்பார்க்கும் வேளை இது. இதற்கிடையில் முக்கியமான மற்றொரு தேர்தலின் முடிவுகள் வெளியாகி இருக்கின்றன. அது என்ன?

ஐஆர்எஸ் என்னும் இந்திய இதழியல் வாசக கணக்கெடுப்பு 2006 முடிவுகள் வெளியிடப் பட்டுள்ளன. இந்த முடிவுகளின் படி முந்தைய கணக்கெடுப்பிலிருந்து இதழ்களின் வாசக எண்ணிக்கையில் பெரும் வீழ்ச்சி தென்படுகிறது.

முதல் இடத்தில் இருக்கும் ஸரஸ் ஸலில் இந்தி இதழ் 63 லட்சம் வாசக எண்ணிக்கை கொண்டுள்ளது. ஆயினும் இது முந்தைய எண்ணிக்கையான 73.61 லட்சத்திலிருந்து பெரும் வீழ்ச்சி கண்டுள்ளது. இரண்டாவது இடத்திலிருக்கும் மலையாள இதழான வனிதா 35.16 லட்சத்திலிருந்து 33.1 லட்சமாகக் குறைந்துள்ளது. 31.93 லட்சத்திலிருந்து 27.7 லட்சமாக இறங்கியுள்ள க்ரிஹஷோபா இந்தி இதழுக்கு மூன்றாமிடம்.

37.59 லட்சம் வாசகர்களைக் கொண்டிருந்த குங்குமம் 26.3 லட்சம் வாசகர்களாக குறைந்தாலும் தமிழில் முதலாவது இடத்தையும் இந்திய அளவில் நான்காவது இடத்தையும் பிடித்துள்ளது. ஐந்தாவது இடத்திலிருக்கும் குமுதம் தமிழில் இரண்டாவது இடம் பெற்று வாசக எண்ணிக்கையில் 30.71 லட்சத்திலிருந்து 25.4 லட்சமாக குறைந்துள்ளது. .

28.49 லட்சத்திலிருந்து 24.4 லட்சம் வாசகர்களாக குறைந்துள்ள இந்தியா டுடேயின் இந்திப் பதிப்பு ஆறாவது இடத்தைப் பிடித்துள்ளது. ஏழாவது இடத்திலிருக்கும் ஆனந்தவிகடன் 25.5 லட்சத்திலிருந்து 23.4 லட்சத்துக்கு சென்று தமிழில் மூன்றாவது இடத்தில் உள்ளது.

ஆங்கில இதழ்களில் India Today முதலிடம், Reader’s Digest இரண்டாமிடம், General Knowledge Today மூன்றாவது இடமும் பெற்றுள்ளன.

தமிழில் பிரம்மாண்டமான தொலைக்காட்சி விளம்பரங்கள் மூலமும் ஏராளமான இலவச இணைப்பு பரிசுகளின் மூலமும் பெற்ற முதலிடத்தை குங்குமம் தொடர்ந்து தக்க வைத்துக் கொண்டு வாசக ஈர்ப்பையும் அது தொடர்ந்து பேண முடிந்திருக்கிறது. நீண்ட கால முதலிடத்தை இழந்த குமுதம் அதை மீண்டும் பெற முயற்சித்ததாக தெரியவில்லை. விகடன் எப்போதுமே குமுதத்திற்கு பின்னால் நிற்பதிலேயே திருப்திப் பட்டுக்கொள்கிறது.

---

ஒரு முக்கிய அறிவிப்பு

தமிழ்ப்பதிவுகள்

சில குறும்படங்கள்

சில தமிழ் குறும்படங்கள் இங்கே,,,

ஒலியும் ஒளியும்

தமிழ்ப்பதிவுகள்

ரஜினி - ஆல்பம்-2

இன்னும் சில சிவாஜி பட ஸ்டில்கள். ரஜினி, ஸ்ரேயா.

முந்தைய ஆல்பம் இங்கே

சிவாஜி படக்காட்சிகள்

தமிழ்ப்பதிவுகள்

தரவரிசையில் இந்தியப் பல்கலைக்கழகங்கள்

உலகின் அதிசிறந்த பல்கலைக்கழகங்கள் பட்டியலை top universities தளம் வெளியிட்டுள்ளது. அது குறித்த வெற்றியின் பதிவு இங்கே.

இங்கே நான் கூற வந்தது இந்தியப் பல்கலைக் கழகங்கள் எத்தனை இதில் இடம் பெற்றுள்ளன என்பதைப் பற்றியது. இந்தப் பட்டியலில் இடம் பெற்றுள்ள முதல் இருநூறு பல்கலைக் கழகங்கள் பட்டியலில் இந்தியப் பல்கலைக் கழகங்கள் மூன்று மட்டும் இடம் பெற்றுள்ளன.

தரவரிசைப் பட்டியலில் கடந்த ஆண்டு 50 வது இடத்தில் இருந்த ஐஐடி இந்த ஆண்டு 57 வது இடத்துக்கு பின்தங்கியுள்ளது. கடந்த ஆண்டு 84 வது இடத்தில் இருந்த ஐஐஎம் இந்த ஆண்டு 68 வது இடத்துக்கு முன்னேறியுள்ளது. கடந்த ஆண்டு 192 வது இடத்தில் இருந்த ஜவகர்லால் நேரு பல்கலை இந்த ஆண்டு 183 வது இடத்துக்கு வந்துள்ளது.

இந்தியாவின் மிகச்சிறந்த பல்கலைக் கழகங்களின் நிலையே இதுவென்றால் மற்ற பல்கலைக்கழகங்கள் உலகத்தரத்தில் எந்த இடத்தில் இருக்கும்?

கணினித்துறையில் சாதனைகளைப் புரிந்து வரும் இந்தியர்கள் இந்த உலகத்தரமில்லாத பல்கலைக்கழகங்களில் படித்து வந்தவர்களே என்று எண்ணும்போது வியப்பாகவும் இருக்கிறது.

தமிழ்ப்பதிவுகள்

சிவாஜியில் ரஜினி-ஆல்பம்-1

இயக்குநர் ஷங்கர் இயக்கும் சிவாஜி திரைப்படத்தில் ரஜினியின் பல்வேறு தோற்றங்கள்

தமிழ்ப்பதிவுகள்

மழை! கவிதை

மழை!

மேகப்படைகளின்
மோதலில் சிதறிய
ரத்தத்துளிகள்!

அகரவலையில் இது 100 வது பதிவு!

தமிழ்ப்பதிவுகள்

கதைக்கவிதை -தேன்கூடுபோட்டிக்கு-4

விடுதலை?

பத்து மாதம்
பந்தச் சிறையில்...
இடையில் ஏதோ வெளிச்சம்.
அவள் பெண்ணென்று அறிய
அநீதியான சோதனை...
அறிந்ததும்
ஏதோ
விஷமாத்திரை
விரைந்து வந்தது...
எப்படியோ
தப்பிப் பிழைத்து
விடுதலைக்காக
காத்திருப்பு.
அந்த நாளும் வந்தது.
சுதந்திரக்
காற்றைச்
சுவாசிக்கும் ஆர்வத்தில்
அவள் அறியாமல் போனது
வெளியே
காத்திருக்கும்
கள்ளிப் பால் சொட்டு.

தமிழ்ப்பதிவுகள்

இருவரிக்கதை -தேன்கூடுபோட்டிக்கு-3

விடுதலை!

அந்த ஆயுள் தண்டனைக் கைதிக்கு இன்று விடுதலை நாள்.
சிறைக்கதவுகள் திறக்கப்படு முன்பே அவன் உயிர் விடுதலை பெற்றிருந்தது.

தமிழ்ப்பதிவுகள்

ஒருவரிக்கதை -தேன்கூடுபோட்டிக்கு-2

விடுதலை!

கிழவியின் உடலில் சிறைப் பட்டிருந்த உயிர் அவளின் நிறைவேறாத காதலின் நாயகனான பக்கத்து வீட்டுக் கிழவர் வந்து வாயில் நீரூற்றியதும் விடுதலை பெற்று சென்றது.

தமிழ்ப்பதிவுகள்

கவிதை -தேன்கூடுபோட்டிக்கு-1

விடுதலை?

நாம் நிரந்தரச் சிறைவாசிகள்
நமக்கெப்போது விடுதலை?

கருவறையிலிருந்து விடுதலையாகி
கல்லறைக்குச் செல்லுமுன்னே
இடையில்
இன்னுமொரு சிறைச்சாலை

சாதிக்கொடுமைகளிலிருந்து
மதமோதல்களிலிருந்து
ஊழல்களில் இருந்து
வன்கொடுமைகளிடமிருந்து
எப்போது விடுதலை

தேசத்தின் விடுதலை
அன்னியர்களிடமிருந்து
இந்த
தேகத்தின் விடுதலை
வன்முறைகளிடமிருந்து

எப்போது கிடைக்கும் விடுதலை?

தமிழ்ப்பதிவுகள்

தேன்கூடு போட்டி விவாதங்கள் தொடர்ச்சி...

தேன்கூடு போட்டி விவாதங்கள் என்ற என் முந்தைய பதிவில் கூறப்பட்டுள்ள ஆலோசனைகளோடு தொடர்புடைய சில விளக்கங்கள் தேன்கூடு வலைப்பதிவில் அளிக்கப் பட்டிருக்கின்றன.

அதன் சில பகுதிகள்:

இந்த போட்டிகளின் மிக முக்கிய நோக்கங்களில் ஒன்று:

நல்ல எழுத்துக்களை
வலைப்பதிவுகளில் ஊக்குவிப்பது, புதிய வலைப்பதிவர்களுக்கு தமிழில் எழுதும்
ஆர்வத்தினை உருவாக்குவது.

தேன்கூடு.காம் - தமிழ் வலைப்பதிவுகளின் திரட்டி,
தொகுப்பகம் மற்றும் வலைவாசல் என்ற முறையில் நல்ல எழுத்துக்களை வலைப்பதிவுகளில்
ஊக்குவிப்பது எங்களின் முக்கிய நோக்கமாகக் கருதுகிறோம்.

ஒவ்வொரு முறையும்
நாங்கள் குறிப்பிடுவது போல, வலைப்பதிவாளர்களின் திறமையை அவர்கள் பாணியில் அவர்கள்
பதிவிலேயே வெளிப்படுத்துவதில் உள்ள சுவாரசி்யம் வேறெதிலும் இல்லை என்று நிச்சயம்
நம்புகிறோம். ஆக்கங்களில் கூட, வலைப்பதிவுகளின் அனைத்து சாத்தியக்கூறுகளையும்
எதிர்பார்க்கிறோம். அது பிளாஷ் மென்பொருளில் செய்யப்பட்டு பதியப்படுவதாக
இருக்கலாம்; பாட் கேஸ்டிக் ஆக இருக்கலாம்; புகைப்படங்களாக இருக்கலாம்; வீடியோவாக
இருக்கலாம்; அல்லது கவிதை கதை போன்ற அனைத்து படைப்புக்கூறுகளாகவும் இருக்கலாம்.
எதுவாக இருந்தாலும், போட்டிக்கான தலைப்பின் தொடர்புடையதாக இருக்க வேண்டும் என்பதே
முக்கியம்.

பெயர் வெளியிடாமல், ஆக்கங்களை நாங்கள் பெற்றுக்கொண்டு
பதிப்பிப்பது போன்ற முறைகள் இந்த நோக்கங்களுக்கு தடையாக இருக்கும் என்பதினை மனதில்
கொள்ள வேண்டுகிறோம்.

போட்டியில் பங்கேற்பவர்களின் ஆக்கத்திற்கு உடனடியாக
கிடைக்கும், பின்னூட்டங்கள்; விமர்சனங்கள் இவையே இங்கு போட்டியாளர்களுக்கு
கிடைக்கும் உடனடி பரிசுகள் என்று கருதுகிறோம்.

வாக்கெடுப்பின் முறையிலுள்ள
குறைகளைக் குறைக்கும் விதமாக, இந்த மாதத்தின் சில நேரங்களில் சோதனையில் இருந்த
முறைகள் வரும் மாதப் போட்டியில் முழுமையாக இருக்கும். இது கள்ள வோட்டுகளின்
எண்ணிக்கையை முற்றிலும் குறைக்ககூடும் என்று சொல்வதற்கில்லை. ஆனால் நிச்சயம்
குறைக்கக்கூடும்.( உதா: செப்டம்பர் போட்டியின், கடைசி நாள் கடைசி சில
மணித்துளிகளில் ஒரே கணிணியிலிருந்து மீண்டும் மீண்டும் வாக்கெடுப்பில் கலந்து
கொண்டு போட்டியின் நோக்கத்தினை, எங்களின் முயற்சி மற்றும் உழைப்பினை,
போட்டியாளர்களின் ஆர்வத்தினை வேடிக்கையாக்க முயற்சி செய்திட்ட சிலரின் முயற்சிகளைத்
தவிர்க்கக் கூடும்.)

வரும் மாதங்களின் போட்டிகளில் வேறு சில மாற்றங்களும்
உங்கள் ஆதரவுடன் செய்ய நினைத்திருக்கிறோம்!

ஆகவே வலைப்பதிவுகளில் படைப்புக்களின் தர மேம்பாட்டுக்கு இந்தப் போட்டி உதவ வேண்டும் என்ற தேன்கூடு நண்பர்களின் நோக்கம் போட்டிப் படைப்புகள் வலைப்பதிவிலேயே இருக்க வேண்டியதன் காரணமாகிறது.

அவ்வாறாக இருந்தாலும் வலைப்பதிவுகளுக்கு தொடர்பேயில்லாத படைப்பாளர்களின் நண்பர்கள் வாக்களிப்பில் மட்டும் கலந்து கொண்டு வாக்களிப்பது என்பது சில நேரங்களில் நேர்மையற்ற முடிவுகளைத் தர வாய்ப்புண்டு.

மேலும் ஐபி தடை போன்ற தொழில் நுட்ப விவகாரங்கள் எந்த அளவுக்கு பலனளிக்கும் என்பதும் கேள்விக்குறியே. அதில் பல்வேறு பிரச்சினைகளும் உள்ளன.

இதற்கு மாற்றாக குறைந்த பட்சம் ஒரு இயங்கும் வலைப்பதிவைச் சொந்தமாகக் கொண்ட வலைப்பதிவர்கள் மட்டும் வாக்களிக்க அனுமதித்தால் தொடர்பற்ற பிற நபர்கள் வாக்களிப்பதை தவிர்க்க முடியும்.

இதற்கெல்லாம் மேலானது படைப்பாளர்கள் தங்கள் படைப்பின் மீது வைக்கும் நம்பிக்கை. அதுவே இப்போட்டிக்கு வெற்றியை தேடித்தரும்.

வழக்கம் போல ஆர்வமுள்ள நண்பர்கள் படைப்புகளை விமர்சனம் செய்வது போட்டிக்கு சுவை கூட்டும். படைப்புகளை திரட்டிகளில் அவ்வப்போது வாசிக்காத, கவனிக்காதவர்களும் படைப்பை தேடி வாசிக்க வைப்பது விமர்சனங்களே. படைப்பை உருவாக்குவது போலவே விமர்சனமும் ஒரு தனித்திறமை. அதில் தெரியும் ஆர்வமும் படைப்பை பற்றிய சிறிய அறிமுகக் குறிப்புகளும் படைப்பாளிக்கும் ஊக்கமூட்டுவன. மதிப்பெண்களை மட்டும் தவிர்ப்பது நல்லது.

இம்மாத போட்டிக்கு ஆசாத் அவர்கள் விடுதலை என்ற தலைப்பை தந்திருக்கிறார். அனைவரும் விடுதலையோடு விளையாடுவோம்.

தமிழ்ப்பதிவுகள்

படைப்பும் பார்வையும்

1

தேன்கூடு தளத்தில் லிப்ட் என்ற சொல்லுக்கு தரப்பட்டிருந்த பொருள் இந்தக் கவிதைக்கு வித்திட்டது. போட்டிக்கு அனுப்பிய பின் சில திருத்தங்கள் தோன்றியது. ஆனால் விதிமுறைகளின் படி பதிவில் திருத்தம் செய்யவில்லை. திருத்தப்பட்ட முழுக்கவிதை இங்கே.

கொஞ்சம் லிப்ட் கிடைக்குமா?

*
கொஞ்சம் லிப்ட்
கிடைக்குமா?
சாலையோரமாய்
அல்ல
வாழ்வினோரமாய்
காத்திருந்தேன்.

ஏற்றிவிட்ட ஏணியை
எட்டி உதைக்கும் கூட்டம்
பெருகிவிட்ட காலத்தில்
ஏணிகள் அஞ்சுவது
இயற்கைதான்.

ஏறிவிட ஏணியில்லை
ஏற்றிவிட யாருமில்லை
வீற்றிருந்த காலமெல்லாம்
வீணாகிப் போனதிங்கே...

படிக்காத பாடங்கள்
படித்தபின்னே
புத்தியென்னும்
உத்தி தெளியும்

ஏணிவேண்டாம்
எவரும்வேண்டாம்
தன்னம்பிக்கை எனும்
தளரா உறுதி கூட
ஏணியாக ஏற்றிவிடும்...

தாமதமாய்
தானுணர்ந்து
ஏறுகிறேன்
வாழ்க்கையெனும்
ஏறுபாதையில்...

எட்டாத தூரத்தில் சிகரம்
எட்டுமென்ற நம்பிக்கை
எனக்குரம்...

[கவிதை]

விமர்சகர்கள் பார்வையில்:

சோம்பேறி பையன் விமர்சனம்:

வாழ்க்கை மீதுள்ள நம்பிக்கை பற்றிய கவிதை.

எளிமையான, சிற்சிறு வரிகள் கவிதைக்கு பலம்.
"எட்டாத தூரத்தில் சிகரம்
எட்டுமென்ற நம்பிக்கை
எனக்குரம்... "
போன்றவை ரசிக்க வைக்கின்றன.

கவிதை, நம்பிக்கை !!

முரட்டுக் காளை விமர்சனம்:

"சிகரம் எட்டுமென்ற நம்பிக்கையே நமக்கும் உரமாய்"

பின்னூட்ட விமர்சனம்:

#முரட்டுக்காளை கூறுவது:

கவிதை வாசித்தேன். அருமை.

*
2

போட்டிக்கான தலைப்பை வாசித்தவுடன் கொஞ்சம் வித்தியாசமாக எழுதத் தோன்றியது. சிறுகதையின் இலக்கணங்களை உள்ளடக்கியதாக, துவக்கம், களம், சஸ்பென்ஸ், முடிவு என எல்லாம் அமைந்த ஒரு கதை, வாசித்த பிறகு கதை நிகழ்வு வாசகரின் மனத்திரையில் ஓடவேண்டும் என்ற நோக்கத்துடன் எழுதியது. நோக்கத்தில் வெற்றி கண்டதாகவே கருதுகிறேன்.

கொஞ்சம் லிப்ட் கிடைக்குமா?

வேகமாகச் சென்று கொண்டிருந்த காரை நிறுத்தி "கொஞ்சம் லிப்ட் கிடைக்குமா?" என்ற இளம்பெண் மறுநாள் சாலையோரம் கற்பழித்துக் கொல்லப்பட்டுக் கிடந்தாள். போஸ்ட்மார்ட்டம் ரிப்போர்ட்டில் அவளுக்கு எய்ட்ஸ்.

[இருவரிக்கதை]

விமர்சகர்கள் பார்வையில்:

சோம்பேறி பையன் விமர்சனம்:

இரண்டு வரிகளில் ஒரு அருமையான கதை.
க்ளைமேக்ஸ் நச்.
தேர்ந்தெடுத்த வார்த்தைகள், களம், முடிவு என அசத்துகிறது கதை.
நிச்சயம் படிக்க வேண்டும். கதை, கலக்கல் !!

முரட்டுக் காளை விமர்சனம்:

"நிமிடத்தில் படிச்சிடலாம்.
வியப்பு தான் அகல சிலநேரம் பிடிக்கும்."

பின்னூட்ட விமர்சனம்:

# அமுதன் கூறுவது:

நல்ல கதை....
இரண்டு வரிகளில் நச்சென்று இருக்கிறது.....
இருவரிக் கதை என்ற பெயரில் ஹைக்கூ கதை முயற்சி....
வாழ்த்துக்கள்,....

# நெல்லை சிவா கூறுவது:

பக்கம் பக்கமாக எழுதி கவர முற்பட்டுக் கொண்டிருக்க,
இரண்டே வரிகளில்,
இதயம் கவருவது திறமைதான். வாழ்த்துக்கள்

# முரட்டுக்காளை கூறுவது:

தலைப்பு கொடுத்தவரே கொஞ்சம் நிறைய எழுதியிருக்கிறார்.
நீங்க இப்படி 2 மார்க் பதில் எழுதுற மாதிரி ஆக்கீட்டிங்களே.. :-)
ஆனா சூப்பர்.

# Dubukku கூறுவது:

very nice attempt. have voted for this cheers :)

*

வாக்களித்த நண்பர்களுக்கு நன்றி!

தமிழ்ப்பதிவுகள்

தேன்கூடு போட்டி விவாதங்கள்!

தேன்கூடு-தமிழோவியம் இணைந்து நடத்தும் படைப்பாக்கப் போட்டி தமிழ் வலைப்பதிவர்களுக்கு மிகுந்த ஆர்வமூட்டும் போட்டி. இந்த நோக்கமும் முயற்சியும் மிக உயர்வானது.

இப்போட்டியின் வெற்றியாளர்கள் வலைப்பதிவர்களால் வாக்களிப்பு முறையில் தேர்வு செய்யப் படுகின்றனர். இதிலுள்ள சில பிரச்சினைகளால் இப்போது மிகுந்த சர்ச்சைக்குள்ளாகி வருகிறது. பல பதிவர்கள் தங்கள் தனிப்பட்ட செல்வாக்கு, நண்பர்கள், ஆதரவாளர்களின் வாக்குகளைப் பெற்று வெற்றி பெறுவதாக சர்ச்சைகள் உருவாகியுள்ளன. இதில் ஓரளவு உண்மையும் இருக்கக்கூடும்.

ஆரம்பத்திலேயே பதிவர்கள் போட்டிப் படைப்புகளைத் தங்கள் பதிவுகளிலேயே வெளியிட வேண்டும் என்ற கருத்தில் எனக்கு உடன்பாடு இல்லை தான். அதனாலேயே ஆரம்ப போட்டிகளில் நான் கலந்து கொள்ளவில்லை. பெயரறியாமல் தான் படைப்புகளுக்கான வாக்களிப்பு நடைபெற்றிருக்க வேண்டும். அப்போது கூட சிலர் ரகசிய பிரச்சாரம் மேற்கொள்ளலாம் என்ற போதும்!

எனினும் இம்முறை தலைப்பு தந்த உத்வேகத்தில் எழுதிய சின்னஞ் சிறுகதையை சும்மா பதிவிட வேண்டாமே என்று போட்டிக்கான இணைப்பில் பதிவு செய்தேன். அங்கே கண்ட lift என்ற சொல்லுக்கான பொருள் கவிதைக்கான விதை தூவியதில் கவிதையும் தயார்.

எனினும் தொடர்கதையை விளம்பரப் படுத்திய நான் போட்டிக்கான படைப்புகளுக்கு எந்தச்சிறு விளம்பரமும், பிரச்சாரமும் செய்யாதிருக்க கவனமாக இருந்தேன். உண்மையில் அந்தப் படைப்புகளைப் படித்தவர்கள் மிகச்சிலரே! திரட்டிகளில் பார்த்து, நேரடியாக போட்டி பட்டியலில் இருந்து படித்து எத்தனை பேர் வாக்களிக்கிறார்கள் என்று அறியும் நோக்கமிருந்தது.

எனது படைப்புகளுக்கு 15 மற்றும் 14 வாக்குகள் விழுந்துள்ளன. இதில் முக்கியமாக சோம்பேறி பையன் மற்றும் முரட்டுக்காளை ஆகியோர் எழுதிய விமர்சனப் பதிவுகளில் இந்தக் கதை பற்றிய உயர்வான புகழுரை கேட்டே பலரும் வாசித்திருக்க வேண்டும்/வாக்களித்திருக்க வேண்டும்.

இவ்வளவு படைப்புகள் வந்துள்ள நிலையில் கவனம் பெறுவது என்பது சாதாரண விஷயமல்ல. ஆனால் படைப்புகளுக்காக என்றில்லாமல் படைப்பாளிகளுக்காக பெறப்படும் கவனம் நேர்மையான போட்டிகளுக்கு இடையூறானதுதான்.

எனவே போட்டியை நடத்தும் தேன்கூடு-தமிழோவியம் நிர்வாகத்தினர் விதிமுறைகளை மறுபரிசீலனை செய்து தேவையான மாற்றங்களை மேற்கொள்வது நல்லது.

பிற போட்டிகள் பலவும் நடுவர்களால் மட்டுமே தேர்வு செய்யப்படும் நிலையில் மாறுபட்ட முறையில் பதிவர்களின் பங்களிப்புடன் தேர்வு செய்யப்படும் வாக்குப் பதிவு முறை நீக்கப்பட அவசியமில்லை. வாக்களிப்பு முறைதான் இந்தப் போட்டிக்கான தனித்துவம் என்பதால் இதை சில மாற்றங்களுடன் மேற்கொள்ளலாம்.

மேலும் கதை, கவிதை, கட்டுரை அனைத்தையும் ஒரே போட்டிக்கான வரைமுறையில் வைத்திருப்பது சரியானதாகத் தோன்றவில்லை. தொடர்பதிவுகள் போட்டிக்கு அனுமதிக்கப்படுவதும் சரியெனத் தோன்றவில்லை. ஒரே தலைப்பில் கதை, கவிதை, கட்டுரைகளைத் தனித்தனியாகத் தேர்வு செய்யலாம்.

போட்டிக்கான படைப்புகள் மின்னஞ்சல் மூலம் பெறப்பட்டு பொதுவான ஒரு வலைத்தளத்தில் அல்லது வலைப்பதிவில் இடப்பட்டு வாக்களிப்புக்கு விடப்படலாம். பெயருக்கு பதிலாக எண்கள் மட்டுமே பதிவில் இடப்பட வேண்டும். உதாரணமாக கதை-1, கதை-2, கவிதை-1 இப்படி.

சூசகமாகவேனும் சில பெயர்கள் வந்துவிடலாம் என்பதால் அங்கே பின்னூட்டங்கள் அனுமதிக்கப் படாதிருப்பதே நல்லது. அதற்கு மேலும் ரகசியப் பிரச்சாரம் மேற்கொள்ள மாட்டார்கள், தங்கள் படைப்புகளில் நம்பிக்கை வைப்பார்கள் என்றும் பதிவர்களின் நேர்மையில் நம்பிக்கை வைத்து இத்தகைய மாற்றங்களை பரிந்துரைக்க விரும்புகிறேன்.

மேலும் மொத்தமாக விமர்சனம் செய்கிறவர்கள் மதிப்பெண் இடுவதைத் தவிர்ப்பது நல்லது. இதுவும் சில முன்முடிவுகளை வாக்குப் பதிவின்போது ஏற்படுத்திவிட நேரும்.

இத்தகைய மாற்றங்களை மேற்கொள்வதின் மூலம் எதிர்வரும் போட்டிகளில் படைப்புகளின் தேர்வில் ஓரளவுக்கு சர்ச்சைகளைத் தவிர்க்கலாம்.

தமிழ்ப்பதிவுகள்

ஒரு கதை! ஒரு போட்டி!!

கதை கேட்பது என்பது சிறு வயதில் எல்லோருக்குமே மிகவும் விருப்பமான விஷயம் தான். கூட்டுக் குடும்பமாக எல்லோரும் இருந்த காலத்தில் தாத்தா பாட்டிகள் பேரன் பேத்திகளுக்கு கதை சொல்வது வழக்கமாக இருந்தது. இன்றைய அவசரமான உலகில் குடும்பங்கள் சிதைந்தும் பிரிந்தும் பெரியவர்கள் தனியாக குழந்தைகள் தனியாக வாழ வேண்டிய நிர்ப்பந்தமாகி விட்டது. இன்றைய குழந்தைகளுக்கு பெரியவர்களிடம், தங்கள் தாத்தா பாட்டியிடம் கதை கேட்கும் பாக்கியம் இல்லை.

இன்று அவர்களுக்கு கார்ட்டூன் சானல்கள் சொல்லும் கதைகள் தான் தஞ்சம். அன்று பெரியவர்கள் சொன்ன கதைகளில் லாஜிக் இல்லாமலிருக்கலாம். மூடநம்பிக்கைகள் மிகைப்படுத்தப் பட்டிருக்கலாம். ஆனால் கதை என்னும் வற்றாத ஊற்று கடந்து செல்லும் பரிமாணங்கள் எட்டாத உயரத்துக்கு செல்லும். டிஜிட்டல் கதைகளின் கிராபிக்ஸ் மாயங்களைவிட பழங்கதைகளில் ஜாலங்கள் அதிகம்.

என்றோ கேட்டகதைகளின் நினைவலைகளை மீட்டி சொந்தக் கற்பனை கலந்து புதிய களத்தில் சற்றே பெரிய கதையாகச் செய்தேன். வலைப்பதிவில் ஒரு புதிய முயற்சியாக அதை சிறுசிறு பாகங்களாக ஒரு பதிவில் இட்டேன். கதையும் முடிவுக்கு வந்து விட்டது. இன்னும் ஒரு அத்தியாயம் பாக்கி.

இங்கே...
கதைகேட்பதில் ஆர்வமுள்ள, புதிர்களை விடுவிக்க துடிப்புள்ள அன்பு நண்பர்களுக்காக என் தொடர்கதையிலிருந்து ஒரு சிறு போட்டி.

கதை இங்கே

போட்டிக்கான கேள்வி(கள்) இதுதான்

1) கதையின் ஆரம்பத்தில் வரும் பிணம் எவ்வாறு இறந்திருக்கக் கூடும்?

2) நாகமணியை கிழவர் என்ன செய்திருப்பார்?

கற்பனைக் குதிரையை ஓடவிடுங்கள்!

தமிழ்ப்பதிவுகள்

ஜோதிகா திரைப்புதிர்

அட யாருப்பா அது? கல்யாணமான பொண்ண லுக் விடறது?

கேள்வியை நன்றாகப் படித்து பதிலை மண்டபத்தில் (சாரி மறுமொழியில்) வைத்து விடுங்கள்...

1. ஜோதிகாவின் திரையுலக முதல் நாயகன் யார்?

2. தமிழில் ஜோ நடித்த முதல் படம் எது

3. ஜோதிகா சிறந்த நடிகைக்கான மாநில அரசு விருது பெற்ற படம் எது?

4. ஜோதிகாவுக்கு ஜோடியாக நடித்த அயல்நாட்டு நடிகர் யார்?

5. நக்மாவுக்கும் ஜோதிகாவுக்கும் இடைப்பட்ட மற்ற சகோதரி யார்?

6. ஜானகி என்ற கதாபாத்திரத்தில் ஜோ நடித்த படம் எது?

7. ஜோதிகா சூர்யாவுடன் நடித்த முதல் படம் எது?

மண்டபத்தில் யாரும் எழுதிக் கொடுக்காமல் காப்பியடிக்காமல் பதில் கூறும் புலவருக்கு இம்சை அரசன் பரிசுகளை 100 சவுக்கடிகளாக வழங்குவார்.

*

அமானுஷ்ய ஆவியின் திருஷ்டி பட்ட மோகினி இங்கே...

தமிழ்ப்பதிவுகள்

கொஞ்சம் லிப்ட் கிடைக்குமா?

தேன்கூடுபோட்டி - செப்டம்பர் 2006

கொஞ்சம் லிப்ட்
கிடைக்குமா?
சாலையோரமாய்
அல்ல
வாழ்க்கையோரமாய்
காத்திருந்தேன்.

ஏற்றிவிட்ட ஏணியை
எட்டி உதைக்கும் கூட்டம்
பெருகிவிட்ட காலத்தில்
ஏணிகள் அஞ்சுவது
இயற்கைதான்.

தன்னம்பிக்கை எனும்
தளரா உறுதி கூட
ஏணியாக ஏற்றிவிடும்...

தாமதமாய்
தானுணர்ந்து
ஏறுகிறேன்
வாழ்க்கையெனும்
ஏறுபாதையில்...

எட்டாத தூரத்தில் சிகரம்
எட்டுமென்ற நம்பிக்கை
எனக்குரம்...

-வலைஞன்

வகை: கவிதை.

தமிழ்ப்பதிவுகள்

தேன்கூடு போட்டிக்கு

தலைப்பு: கொஞ்சம் லிப்ட் கிடைக்குமா?
படைப்பு: வலைஞன்.

வேகமாகச் சென்று கொண்டிருந்த காரை நிறுத்தி "கொஞ்சம் லிப்ட் கிடைக்குமா?" என்ற இளம்பெண் மறுநாள் சாலையோரம் கற்பழித்துக் கொல்லப்பட்டுக் கிடந்தாள். போஸ்ட்மார்ட்டம் ரிப்போர்ட்டில் அவளுக்கு எய்ட்ஸ்.

வகை: கதை [இருவரிக்கதை]

தமிழ்ப்பதிவுகள்